Gal 4 | MHL | STEP | Ne yo feenap maiyem. Owow sira feenap, oramiya me arimowa ikok muuk maata ikua, nain wiawi-ke maa onamiarowa nain iiriw maep-puak. Ne maa unowa nain ona wiarik, nain o takiriya mua oram saarik ikua.

Galatians 4

Yeesus yia aaweya i Mua Maneka muuka wiar ikemik

1 Ne yo feenap maiyem. Owow sira feenap, oramiya me arimowa ikok muuk maata ikua, nain wiawi-ke maa onamiarowa nain iiriw maep-puak. Ne maa unowa nain ona wiarik, nain o takiriya mua oram saarik ikua. 2 Ona urufow mua tepak-pa wiar ikua. Ne aakisa arimemi mua arep ona wiawi mokoma pepekimomak nain pepek ereya maa unowa ona urufinon. 3 Aria is pun naap, i takira nain saarik miiw sira tepak-pa ikemkun miiw fain sira-ke yia wasiep ikua. 4 Ne epa eena iiriw Mua Maneka ona pepekimep-puak nain pepek ereya ona Muuka sesekak. Sesekeya onak uroma-pa orop imenarek. Imenaremi Moses sira-pa arimok. 5 Ne Moses sira eena i Yuuda yia wasiep ikua nain os-ke umep yia wasirkap aawok. Naeya i Mua Maneka muuka wiar aremkun opora maep koonowak nain makena yiar arinon. 6 Aria i Mua Maneka muuka wiar aremkun ona Muuka Ewar Eliwa sesekeya i kema-pa yiar ikua. Ne Ewar Eliwa nain-ke kema yieya i Mua Maneka faremi maiyen, “Oo Auwa, yena Auwa,” naap maem-ikaiyen. 7 Naapeya ni aakisa mua oko tepak-pa uuwow mua saarik me ikeman, weetak. Mua Maneka-ke naeya ni o muuka kakeniw wiar ikeman. Naapeya ona maa muutitik nain nis-ke onamiarowen.

Yeesus opora baliwep ookowa-ke

8 Ne ni iiriw Mua Maneka me amisarowa ikok ni owow sira niena inasina nain tepak-pa ikeman. 9 Nain ni aakisa Mua Maneka amisareman. Weetak, feenap maiyem, me nis-ke o amisareman, weetak, os-ke ni nia amisarep nia aawok. Nain ni aakisa kamenap naep kiiriw naapiw kema kireman, ne wi sira ne maa kekanowa marewa ne onom marewa nain ookami tepak-pa wiar ikaiyen naep oniman! 10 Ni naap onami mokoma, siiwa, ona saana-pa imenariya nain sira-sira oniman, ne fofa wuap sira-sira oniman. 11 Yo iiriw Yeesus opora nia maakem-ikem. Ni muuta nain yo kema unu-unowa wuami naiyem, oram maneka uuwam-ikem-yon.

12 Emar unowik, ni aakisa unow onaiya kema kiremi yo saarik ikeka naep nia maakiyem. Yos pun ni saarik naap nain-ke. Ni sira samora-ko me efa onaman. 13 Ni feenap efa amisareman, yo iiriw mokomokoka Yeesus opora nia maakem-miem nain napum maneka onaiya ikok niar ikiwem. Yo napuma naap ikok opora nia maakem-miem. 14 Ne iir nain yo napum onaiya ikemkun yo efa kakaltami yoowa aawem-ikeman. Nain me efa baurareman, ne pun me efa samoraman, weetak, baliwep akena efa wuam-ikeman. Yo Mua Maneka ensel-ke efa naep efa saliwam-ikeman. Ne pun Yeesus Krais saliwowa saarik, naap efa saliwam-ikeman. 15 Ne ni iir nain akena kemelami palanowiw ikeman nain aakisa kamenap naep me palaneman? Ne yo iir nain sira eliwa niar urufap feenap nia naem, yo mokoka efar samorareya ni pepek erap-na niena mokoka pusunowap yo wuomekaman, nia naem. 16 Yo Yeesus opor eliwa unowa kemena fookap kakeniw akena nia maakem, nain aakisa nis-ke iiwua efa arowaman-i?

17 Wi teeria oko-ke kema nia mikami nia aawep wiena teeria-pa nia wuamik, wi nain kekanemik. Ni eliw ikeka naep naap me nia onimik, weetak. Ni i yia piipuap kookalowa wiokowa nain palanuk naep kema nia mikimik. 18 Maa kema suuwap palanem-ikowa eliwa-ke, nain ni maa eliwa muuta nain palaneka. Anane palanem-ikowa nain eliwa-ke. Yo niamiya ikemkun sira eliwa palaneman. Aria epasia-pa ikemkun nis pun uuwowa palanem-ikeka. 19 Aria yena muuk unowa kema muneka, ni nia naep yo aakisa kema samorariyem. Yo wi emeria uroma wia opiya saarik sirirowa maneka kiiriw naap aawem-ikaiyem, nain ni kiiriw nainiw kema kirep Yeesus Krais sira baliwep akena wiar opowen-na yo kema efar siininon. 20 Yena kema-ke naap kema wiisariyem, aakisa yena neeke ni niamiya ikekam aa, naap maiyem. Naeya yo opora kekelka nia maakekam. Moram yo ni muuta nain kema samor ikem.

Yeesus Krais ekima-pa Mua Maneka muuka aremik

21 Ni mua Moses sira wuomakek nain kekanowa ookowa kookaliman nain aakisa nia nokariyem, iiriw i Yuuda kae nanar nain nanar ara oko fain me wiar amisareman-i? 22 Nain feenap, Abraham muuka erup, oko ona uuwow emeria-pa opak nain, ne oko ona emeria kakeniw-pa opak nain unuma Aisak. 23 Ona emeria kakeniw-pa opak nain Mua Maneka iiriw ona muuka iwowa maakep koonowak nain-ke. Ne uuwow emeria-pa opak nain ona kookalowa-pa imenak. 24 Aria i emeria erup nain wia kema suuwikua. Emeria erup nain Mua Maneka yiena kae teeria opora erup maakep koonowak nain wia pepekimok. Uuwow emeria nain Agar naimik nain Sainai ema-pa sira eena Mua Maneka-ke Moses sira iweya wuomakek nain pepekimok. Ne muuka nain teeria nain, Moses sira wuomakek nain-ke wia wasiep ikua. 25 Agar naemi Sainai ema Arebia-pa ikua nain naimik. Neemi Yerusalem owow maneka nain pun naimik. Owowa nain wi mua onaiya wiena sira awona-ke wia wasiep ikua. 26 Aria, owowa iinan-pa ikua nain Yerusalem owow enuma naimik, wi mua owowa nan ikemik nain Moses sira nain me wia wasiep ikua. Nain Abraham ona emeria kakeniw nain i yiena aite-ke naimik. 27 Moram iiriw Mua Maneka opora wiar siisimep-puiwkin ikua nain feenap maek,

“No emeria sumarsa nain no kemele. No aakisa name irami someka kerewa fakere. Moram, makena no sumarsa muukarowa sirirowa me furewan, nain ikoka nena niimasip teeria kerew akena nefar imenarikuan. Ne emeria ona mua onaiya ikua nain muuka wiipa kerewa me wiar imenarikuan.”
(Aisaiya 54.1)
28 Naapeya emar unowik, i Abraham muuka Aisak saarik nain-ke. Muuka eena Mua Maneka Abraham opora maakep koonowap-pueya ona emeria kakeniw uroma-pa imenarek. Ne nis pun naap, Mua Maneka opora nia maakep koonowap-pueya ni Yeesus Krais opora opap Mua Maneka muuka wiar areman. 29 Aria muuka eena Ewar kekanowa-pa imenarek nain iir oko-pa muuka eena uuwow emeria-pa imenarek nain-ke fafarumak. Naeya ni eena muuka Ewar kekanowa-pa imenarek nain saarik. Ni aakisa wi somek mua wadola-ke sira naap nia onam-ikaimik. 30 Ne ni Mua Maneka opora kamenap maek nain wiar kema suuweka. Opora feenap, Mua Maneka-ke Abraham emeria kema iweya ona mua feenap maakek,

“Uuwow emeria nain muuka onaiya wia iirareya ikiwuk. Moram yo muuka maa muutitik wuomowa maen nain o muuka nain-ke ikoka yo muuka ikos maa kuisow nainiw me onamiaruk, weetak akena.”
(Yenesis 21.10)
31 Naapeya emar unowik, yo iiwawun feenap maiyem, i aakisa uuwow emeria nain muuk teeria-pa me wiar ikemik, weetak. I Abraham ona emeria kakeniw-pa muuka opak nain teeria-pa wiar ikemik.